Rowena Dilay Llego

Dear Ms. Llego,

Salamat po sa pitong taon na paggabay sa akin. Salamat po dahil nandiyan ka para makiisa sa mga masasayang pangyayari sakin. Salamat po sa suporta na binigay mo sakin sa lahat ng mga bagay na sinubukan at pinasok ko. Salamat po dahil maging grade 4 man ako o grade 10, hinayaan niyo po akong maging parte ng mga taon mo sa Sacred Heart College.

Kahapon po, salamat sa pakikinig sa aking mga pagbabalik-tanaw. Hindi po ako magsasawang balikan kung paano ka nagalit nung may naghabulan ng itak sa classroom dahil sa sobrang pag-aalala mo sa amin. Tinuro mo po sa akin na ang dapat kagalitan ay ang masamang ginawa at pag-uugali ng tao at hindi yung tao mismo.

Hindi ko po alam kung ano ang mangyayari sa akin sa pagtungtong ko ng kolehiyo. Hindi ko po alam kung sa muling pagbalik ko sa SHC ay nandito pa kayo. Ang sigurado ko lang po ay kulang pa ang mga daliri ko sa kamay at paa para mabilang ang lahat ng mga pagbabagong mangyayari sa buhay ko. Pero hindi po magbabago ang katunayan na naging bahagi po ikaw ng paglaki at paglago ng maraming estudyanteng nakahalubilo mo, lalo na po ako. Maraming salamat po. Mamimiss po kita. <3

—April 13, 2012

Mary Jean R. Morales

“Mawala na ka’yo, huwag lang ang class record ko” 

Dear Ms. Morales,

Masisisi mo po ba ako kung hindi ko malimutan yang linya na yan? Haha. Pero pasensya din po sa laki ng gulo na idinulot sa’yo ng 8-Modesty, batch 2009-2010.

Daig pa ng grade 8 ko ang ferris wheel sa perya sa sobrang daming pagtaas at pagbaba na naramdaman ko. Pero salamat po dahil kahit papaano, marami pa ring masayang ala-ala ang ibinigay niyo sakin ng Modesty. 

Yung photo album po ba nasa’yo pa? Laking asar ko noon sa mga kaklase ko nung malaman kong nakita mo na yung mga pictures bago pa namin ibigay sa’yo. Haha. Surprise kasi tapos ganun yung nangyari. Effort ko po yun kaya ingatan mo ha? Eto na po yung letter kong long overdue. 

Hindi ko po alam kung tanda mo pa pero salamat po ulit sa chicharon sa canteen at chili dynamite sa labas. Salamat din po dahil naniwala ka sa kakayahan ko sa pagsusulat. Salamat dahil sinubukan mong linangin ang kakayahan kong ‘to. Salamat po ng sobra-sobra sa paniniwala sakin. Mamimiss po kita.

—April 13, 2012

Ronualdo L. Revilla

Dear Teacher Rhon,

Maraming maraming salamat po sa dalawang taon na pagtuturo mo sa amin, Computer IX at Calculus X. Salamat po sa pagtuturo sa amin na pahalagahan ang bawat oras na lumilipas, na wala dapat oras na sinasayang, na dapat ay lagi tayong handa sa mga pagsubok na maaaring ibato sa atin, at kung magkamali man tayo ay dapat handa tayong harapin ang consequence na dala nito. Yan ang mga natutunan ko sa mga pagsusulit mong de oras. 

Tanda mo po nung nanuod tayo ng ‘Hachiko: A Dog’s Story’ sa laptop mong naglag? Haha. Wala lang. Salamat po. Salamat din po kasi kahit papaano, nakakasulyap ako sa personal na buhay mo. 

May nakapagsabi na po ba sa’yo na terror kang magalit? Grabe. Haha. Hindi ko alam ang pakiramdam kapag naging adviser kita pero kuntento na ko sa Teacher Rhon na nakilala ko sa LBED Computer Lab dalawang taon na ang nakakalipas. Mamimiss po kita.

—April 11, 2012